Assina Memorando de Intendimento entre SED ho RTTL

Last Updated on Tuesday, 30 November 1999 07:00 Monday, 08 February 2010 10:33

Iha loron Quinta, 29 Outubro 2009, iha Salaun Enkontru Secretaria de Estado Defesa (SED), Palacio do Governo, hala’o ona seremónia assina Memorando de Intendimento entre SED ho Rádio Televizaun Timor Leste (RTTL).

Memorando de Intendimento (MdI) ne’e nu’udar akordu ida ne’ebé Secretaria de Estado da Defesa (SED) halo ho Rádio Televizaun Timor Leste (RTTL) konaba programa diseminasaun informasaun setór Defesa nian.

“Programa ida ne’e nu’udar meius ida atu halo komunikasaun ho públiku konaba dezenvolvimentu iha setór Defesa Timor Leste nian. Tamba ne’e, liu husi kanal TVTL no RTL, ita sei hetan benefísiu bo’ot tebes atu hato’o informasaun ho regular ba públiku iha fulan hirak nia laran”, Hateten SED, Sr. Júlio Tomás Pinto.

Liu husi MdI ida ne’e SED ho TVTL konkorda, atu koopera hamutuk hodi habelar informasaun ba públiku konaba polítika IV Governu Konstitusional, liu husi Departementu Relasaun Públika Secretário de Estado da Defesa (SED) relasiona ho progresu no dezemvolvimentu iha setór Defesa nian, inklui mos provizaun hirak nebe IV Governu Konstitusional aprova ona hodi regula konaba setór defesa, obstákulu hirak nebe área defesa hasoru, planu stratéjiku setór Defesa Timor Leste iha loron ohin no ba aban bainrua.

Tuir planu SED, programa diseminasaun informasaun setór Defesa sei hala’o hahu husi fulan Janeiru 2010 to’o Dezembru 2010. Programa hirak ne’e sei hala’o fulan Tolu dala ida, hanesan programa regular, programa diálogu interativu, nomos programa ‘Directa’,  ba tópiku balu nebe SED hanoin presija atu hatan lalais ba informasaun importante balu nebe públiku presija hatene. Tamba ne’e SED ho TVTL konkorda atu realiza programa hirak  hanesan tuir mai:
1. Programa Regular (Programa Regular sei hala’o fulan tolu dala ida, nu’udar programa ida nebe sei determina kedas ho tópiku debate, tan ne’e SED ho TVTL sei koopera hamutuk  atu buka oradores ba tópiku ida-idak nebe determina tiha ona (hare iha anexu 1 konaba programa debate regular ho tópiku, inklui mos identifika kedas oradores sira)
2. Programa diálogu interativu (Programa diálogu interativu nu’udar programa ida nebe sei hala’o tuir horário TVTL nian, nomos karik sei decide hamutuk, atu hatan ba kestaun hirak nebe SED hanoin katak presija hato’o imformasaun ruma nebe klaru ba públiku konaba asuntu subtansial balu relasiona ho setór Defesa nian. SED ho TVTL sei koopera hamutuk  atu buka oradores ba programa diálogu interativu).
3. Programa ‘Directa’ (Live) (SED ho TVTL mos konkorda atu hala’o transmisaun ‘directa’ ba loron komemorasaun F-FDTL nian nebe identifika tuir kalendariu (Anexu 1 kalendariu loron boot ba F-FDTL)).

Karik tamba problema tékniku, labele realiza programa diálogu tuir horário nebe determina tiha ona, TVTL konkorda atu realiza fali programa ne’e iha tempu nebe SED ho TVTL sei determina hamutuk.

SED nu’udar parte ida nebe iha poder atu responsabliza ba programa hirak nebe mensiona iha MdI ida ne’e nia laran. TVTL nu’udar parte ida nebe sei tulun fasilita produsaun programa SED, tuir MdI entre Parte Rua.

Bazeia ba ideias hirak ne’e SED ho RTTL konkorda, tuir Memorando de Intendimento, atu hala’o programa diseminasaun informasaun setór Defesa ne’ebé sei regula iha MdI ida ne’e.

Programa hotu-hotu nebe TVTL grava hanesan programa diálogu regular, Interativu, no directa sei kopia iha CD ka meius ruma nebe sei sai hanesan dokumentasaun. TVTL konkorda atu fo hotu kopia husi programa hirak nebe mensiona iha pontu 3.1 ba SED Molok fulan ida MdI remata.

SED ho TVTL konkorda sei uza meius mediasaun no diskusaun,  atu resolve problema hirak nebe relasiona ho konteudu husi MdI ne’e, interpretasaun, ka implementasaun ruma nebe mosu durante MdI ne’e sei válido, no sei la uza mekanismu legal nu’udar dalam ida atu resolve disputa sira.

Karik iha hanoin ruma atu muda subtansia husi MdI ne’e, SED ho TVTL sei halo diskusaun no deside hamutuk atu implementa programa hirak ne’e ho diak.

Dokumentu hotu nebe relasiona ho MdI ida ne’e sei hakerek iha lian Tetum, tamba ne’e atu halo interpretasaun hodi kumpriende ba konteudu husi MdI ne’e sei uja lian Tetum hanesan dokumentu original.

Kustus ba programa hirak nebe mensiona iha pontu 3.1 mak hanesan tuir mai:
• Programa Regular   : $ 580.00
• Programa transmisaun Directa : $ 1.660.00
TVTL sei responsabliza atu selu taxa ba kustus hirak ne’e tuir leis nebe vigora iha Repúblika Demokrátika Timor Leste.